推捒：韓國BL劇ê天篷—《語意錯誤》

    這篇文章是2022.6.20寫佇別位ê部份內容，做記錄kah紀念，將介紹ê部份轉過來遮，時間mā綴原底ê發佈日子，特別做一个說明，是我行入韓國迷眾跤步ê頭一步。

    2022月春天，韓國Watcha平台放送對小說改過來ê BL網路劇——《語意錯誤》 (韓語：시맨틱에러，英語：Semantic Error)，因為導演對人物、場地ê細節誠幼路咧處理，演員朴宰燦kah大伊八歲ê sia̋n-pái 朴栖含mā表演kah足有氣氛，177公分ê朴宰燦予193公分ê朴栖含攬咧若囡仔仝款，私底下in兩个ê相處比一般ê朋友koh-khah親密，引起ài看BL劇ê觀眾真大ê興趣，兩个人自按呢衝kah掠未牢。

    結果朴栖含因為年歲到矣，佇上尾集放送彼工就去做兵矣

    佇韓國做兵ài兩年，做兵期間禁止公開演出， 和社群平台都無啥會當貼相片，朴宰燦就開始一个人走宣傳，和逐家分享拍戲彼時發生ê代誌，mā講誠濟伊kah朴栖含ê互動；好佳哉(mā誠毋甘)朴栖含對2016年就出道，進前是韓國男團KNK ê成員之一，佇浮浮沉沉彼幾年，甚至到離開KNK了後、beh拍戲進前，佇網路頂懸留足濟影片，通好予迷眾來挖。

    古錐緣投gâu表演ê朴宰燦kah外形迷人個性suah小可仔天天ê朴栖含，兩个人實際上和戲齣內底袂輸是顛倒反，suah予觀眾感受tio̍h無仝ê吸引力，開始對戲齣逐出來到現實世界，成做in ê迷眾來替in oo-ián。

    若有機會，請逐家一定ài揣這齣戲來看覓，看了若kah我仝款，開始會去揣演員其他訊息，咱會當做伙來討論，做伙用台語來「逐明星」、「做迷眾」

    || BL：Boy's love，以男性戀愛為主ê相關創作，kah同志m̄是仝意思ê詞，袂當濫做伙用

    || 激膠 kik-ka ：講話議論khah極端、激動

    || oo-ián：支持、聲援、贊聲

#語意錯誤 #朴栖含 #朴宰燦 #시맨틱에러 #SemanticError #台語文 #栖燦 #張秋情侶 #Taiwanese