DKZ珉奎，生日快樂！

2023年ê向望，是每一个DKZ成員生日ê時陣，攏寫一篇紹介in有偌古錐、偌得人疼ê台語文章來做紀念，向望我會當好好仔達成。2023年ê第一位，就是咱古錐ê全珉奎전민규^JeonMingyu。

珉奎啊，生日快樂！

（錄音hōo逐家參考，名字盡量唸韓語，若聽起來怪怪真歹勢ㅠㅠ）

名 Miâ	全珉奎 전민규JeonMingyu
生日 Senn-ji̍t	2001.01.09
動物代表 Tōng-bu̍t tāi-piáu	倉鼠🐹 || 鴟鴞🦅
偏名 Phian-miâ	萬奎、萬福ê阿爸、餃(만두)
團隊分配 Thuân-tuī hun-phuè	Main Vocal
MBTI	ENFP

珉奎對我來講是厲害ê歌手、古錐ê麻糍、趣味ê綜藝性格人，雖然佇DKZ內底是上細粒子ê，m̄-koh會當唱上懸ê音，ENFP性格ê伊，嘛上了解beh按怎提升團體氣氛，逐擺hip宣傳相片ê時陣，又koh媠kah予人懷疑伊敢是一仙用心製作ê尪仔？

DKZ原底號做Dongkiz，2019年出道，珉奎是2022年改名改組ê時陣加入ê新成員之一，佇2022年4月12號正式出道。
珉奎是新加入ê主唱，唱歌能力好，是團隊舊成員宰燦認為自出世到這馬看過上gâu唱歌ê人，甚至這馬koh有替宰燦咧上唱歌訓練ê課程；舊年春天IDOL出道，熱天就宣佈以音樂劇〈三劍客〉ê達達尼昂成做音樂劇演員出道，算是誠特殊koh罕得看ê狀況。

2022年10月，佇新專輯發行前一工，珉奎家己參加節目，用「風樂풍락」這个角色參與比賽，用原曲音調唱ê兩條歌，予裁判kah觀眾聽kah目睭仁強欲落出來，得tio̍h彼个節目放送以來上懸ê分數，以後嘛有機會會當用「風樂」這个角色來出專輯，這兩條歌這馬攏會當佇所有音樂平台聽會tio̍h喔（m̄-koh你ài搜揣풍락，袂當揣伊ê名kah DKZ）。

    來東耀(DKZê公司)進前，伊佇別間公司做練習生，定定khǹg唱歌佮跳舞ê影片佇網路頂懸，誠用心咧經營家己，決定beh離開舊公司ê時，伊寫一篇文和逐家相辭，內底講：雖然無法度講新公司ê代誌，m̄-koh已經有欲去ê所在，請逐家等我，我會緊轉來。

    2022年4月12號出道表演彼工，珉奎佮兩位成員去唱片行買專輯，佇彼塊影片內底，伊講tio̍h出道這件代誌，心內感慨誠深，想起khah早練習生時期ê無確定kah驚惶，險險佇影片內底流目屎，舊年底12月30號佇宰燦ê節目內底，珉奎嘛有講：「若是4月12號無出道，這馬ê我敢koh會是這馬按呢？」看會出來，伊對出道這件代誌猶原有真濟m̄敢相信ê想法，m̄-koh珉奎啊，你這馬已經是誠厲害ê歌手kah IDOL矣，ài更加相信家己一寡喔！

    因為成做IDOL，減肥是誠四常ê代誌，但是珉奎koh誠興食，嘛無啥揀食，甚至有講過佇伊ê字典內底無「減肥」這兩字，是佇咧24點鐘直播放送會半暝三點食糋雞肉塊做暗頓ê古錐囡仔，佇電台表演ê時陣，雖然閉思，m̄-koh嘛袂驚做好笑ê代誌，有一改kah成員去電台，koh和隊長鐘亨表演〈Frozen〉內底ê歌，當然，gâu唱懸音ê珉奎唱ê是Anna ê部份，兩个人將一條短短ê歌表演kah若像咧看劇，實在古錐kah看一改無夠。

    雖然官方公佈ê代表動物是古錐ê倉鼠，上細粒子ê珉奎有當時仔面膨皮koh肨奶，實在是足符合倉鼠ê形象，m̄-koh伊定定講伊ê形象應該是鴟鴞，因為這種差別有另外這種古錐ê感覺，所以逐家mā順伊ê意，寫tio̍h伊ê時陣會寫「珉奎🐹（🦅）」來滿足伊。（有夠好笑koh有夠古錐啦）

    2023年拄開始，珉奎就已經接tio̍h三月欲開始演出ê音樂劇〈The Last〉李海真ê角色，向望suà落來伊ê路會愈來愈開闊，hōo koh-khah濟人發現伊若寶藏ê歌聲iah-koh有古錐ê性格。

    今仔日1月9號，是咱DKZ主唱珉奎ê生日，珉奎啊，生日快樂，繼續發光，一定會有愈來愈濟人感受tio̍h你ê美好，咱做伙繼續行，做伙幸福ê聽你美好ê歌聲。

私心推捒珉奎唱ê〈相思花〉