推捒：《Equal》線頂優待

➽ DKZ　JongHyeong（鐘亨）、KyoungYoon（庚潤）
➽ 雙人音樂劇《Equal》日本公演線頂票優待到8/4 10：00
➽ 原價1,200，優待960

歹勢，本底想講欲等DKZ介紹寫了才來分享Equal QQ
結果明仔載就是優待拍折的最後一工，險仔袂赴。
（我拄才閣掠準是到00：00煞，有夠戇）

Equal線頂買票連結（嫌麻煩我會當鬥相共用我的口座買）

 

Equal精彩段落（開場歌曲）

Equal威秀官方放送廣告

　　《Equal》是干焦兩位演員演出強欲兩點鐘的音樂劇，有三到四組演員會輪無仝的時間來演出仝一齣劇本，除了是支持家己佮意的 Idol的機會，嘛會當比較無仝組的演員表現佮欣賞仝齣劇無仝演員對劇的理解。
　　故事本身誠精彩，有一寡神明創造人類的比喻，若你會當接受，共看做較沉重的BL劇.... 嘛是會使得啦（我頭一改看，無先看介紹，一開始的劇情掠準是BL劇）

　　KyoungYoon的歌聲誠穩定，嘛誠有氣勢，JongHyeong有時陣小可仔會走調去，毋過伊的演技真正讚，看甲你會心疼兼毋甘的彼種讚。
　　頭一改看，我彼陣猶未遐佮意𪜶兩个，但是有影予Jonghyeong的演技驚著，會想講「伊竟然進前無搬戲，有夠可惜！」。
　　第二改看，就佇JongHyeong的角色對KyoungYoon受氣的時陣哭甲毋知人，彼條佮烏鴉有關係的歌實在足好聽、使人足毋甘彼个角色QQ　KyoungYoon 嘛是愈表演愈進入角色，頭幾場閣會看著本人的影，韓國上尾場就完全是彼个角色本人矣。

　　因為是三組演員輪流，所以JongHyeong、KyoungYoon 演出kan-na三場：8/6 12:00，8/7 17:00，8/13 16:00
　　最後一場佇信義威秀有直播放送，拜五12點會賣票，有興趣的人嘛會當參考看覓。

　　我嘛是人生頭一改看韓國這種形式的雙人音樂劇，有經驗的迷眾講這種音樂劇定定有，佇韓國是迷眾欲佮Idol見面真好的方式，Idol有機會練演出經驗，迷眾有機會看著Idol佮舞台演出無仝的表演，誠心適。
　　若是你感覺買票愛會員傷麻煩，我會當鬥你買，毋過8/6我已經買矣，若欲看彼場我就無才調鬥相共。
　　若你看著這篇，已經超過8/4 早起10：00嘛免緊張，MetaTheater有五場8折的優待，你會當招看有人欲佮你分無，若無就是買原價、招一寡人做伙看嘛袂䆀！


期待有人看完佮我分享你的感想XD

#Equal #MeteTheater #DKZ #鐘亨 #庚潤 #Musical