推捒：《Equal》東京公演心得
DKZ JongHyeong / KyoungYoon ➽ Equal東京公演心得
我足佮意拜二彼工，遐爾有向望、遐爾活潑，對頭一擺in兩个咧讀批，氣氛開始轉變ê時陣我就已經開始流目屎，因為看過矣，知影遐ê文字攏是一種對話，甚至和後壁咧慶典慶祝ê快樂攏予我感覺心疼。
Nicola安慰Theo ê時陣，唸出彼个咒ê感覺是遐爾仔溫柔……頭一改看7/3韓國場ê時陣，我就是hōo JongHyeong咧做法ê手勢規个唌tio̍h，彼个輕輕仔點額ê動作若咧跳舞仝款，充滿希望kah溫暖，m̄-nā Theo，當咧看線頂放送ê我嘛hòng安慰tio̍h矣。
拜三了後，我開始注意著一寡硬體ê改變，東京場ê光khah柔寡（khah弱）但是氣氛比韓國場koh khah好，鏡頭咧切嘛足無仝，畫面蓋媠，我定定想講可惜無法度用螢幕攝影，m̄-koh這場佇情緒足滿ê時陣前後切換鏡頭小可仔傷緊，淡薄仔影響著情緒ê連結，koh來就是眠床真正比韓國細頂傷濟啦XD
大概是因為去東京放kah足鬆ê，JongHyeong又koh拄鉸頭鬃、染頭毛色，所以東京頭一場ê Nicola看起來非常健康koh爽神，我那聽烏鴉那哭，koh那咧想講：喔，足好ê，去東京有耍kah足歡喜乎？誠好，ài好好仔享受喔！
烏鴉kah白賊話真正是我佇這齣戲內底上佮意ê兩條歌，JongHyeong ê演技佇這兩條歌內底展現kah一清二楚，又koh病、又koh疼、又koh絕望，彼種「我真正足需要你，但是你予我失望，按呢就無愛矣、攏無愛矣，你走、離開。」有影……（哭）
KyoungYoon佇東京這場，等JongHyeong唱烏鴉唱煞，伊beh離開進前，用無仝款的情緒來表達，進前韓國場兩改我攏感覺Theo真正足怨慼，足受氣Nicola會按呢攻擊伊，感覺真正出去就袂koh轉來，m̄-koh東京場是一種足冷淡、慼心ê失望，是「我知矣，原來你是按呢teh看待我？按呢我來走，你就歡喜矣乎？」ê情緒，m̄-koh你看會出來，這个人抑是足要意對方，伊一定會轉來，這个部份kah進前我看ê彼兩改無啥仝款，
後壁ê部份就莫詳細講，因為印象上深抑是頭前這幾場。
𪜶兩个人佇東京頭這場攏唱kah足鬆ê、相對其他演出算是穩定，m̄-koh佇演出節奏有小可仔改變，加上鏡頭切換ê改變，我感覺小可仔可惜，另外有幾个眼神看起來若像咧替對方煩惱（我若像看tio̍h JongHyeong本人ê眼神出來，頕頭了後，koh用眼神講「無問題，你就繼續」ê感覺。）M̄-koh整體抑是足好看，若比氣氛是比韓國場koh較好，非常期待8/13 in佇東京上尾場ê信義威秀直播放送！
戲院直播kah線頂放送這馬攏iah-koh買會tio̍h喔！
➽戲院直播買票：https://reurl.cc/3Y5ZgL
#DKZ #Equal #庚潤 #鐘亨 #東京首演 #韓團
留言
張貼留言
有什麼想說的嗎？歡迎留言交流（揮手）
台語字看不懂的部分也歡迎詢問！