推捒：SeoChan，朴栖含、朴宰燦

 

    這篇原底是7月7號寫tī個人面冊ê文章，仝款搬來遮囥，時間仝款標佇面冊發ê彼工。

   就已經咧虛，早起上課一直走便所去吐，吐kah m̄敢食物件，無欲吐就開始無力，koh氣一个m̄知是血糖低抑是血壓懸咧手掣。無逐工貼朴栖含佮朴宰燦兼寫台文是我ê m̄-tio̍h，我檢討，竟然無出力推捒in予所有講台語ê人認捌𪜶有偌相意愛，真歹勢。

    予我來佮逐家介紹一下，倒手爿是朴栖含，30歲蠍仔座，10月28號生，193公分，原底是韓國KNK成員，2021年9月退團，原底已經準備放棄演藝人生，結果佇生日前一工收tio̍h通知叫伊去試戲（其實是第四擺hòng邀請矣）隔工就入組，開始佮對手演員試戲準備兩禮拜了後拍戲，佇語意錯誤內底搬設計系學生張宰英，戲拍煞放送了後開始反衝起來，m̄-koh拄tio̍h欲做兵，這馬人咧做公益兵，愛明年12月才會當出來繼續活動。

    正手爿是朴宰燦，韓國團體DKZ成員，22歲射手座，12月6號生，177公分，佇團內底的偏名叫做「公主」，全世界上予人寵倖ê成員，做啥攏予迷眾kah成員講古錐，m̄-koh演藝路無順利，團體唱片一直賣無偌好，拍過幾塊仔網路劇，2021年中秋，嘛有認真考慮欲放棄演藝工作，因為網路劇ê經驗，予製作人揣來試戲，試過五六擺、佮三四十个人競爭，提著語意錯誤秋尚宇ê角色。     團體DKZ 4月份回歸，發行〈Cupid 愛情賊偷〉，到六月賣超過二十萬張，雖然佇韓國猶無算第一線hih-tooh--ê，m̄-koh這已經是khah早DKZ 賣唱片ê一百倍超過。

    先講到遮，因為等咧欲上課，m̄-koh咧看ê人敢有發現，𪜶ê外套若像是仝一軀？Tio̍h，因為𪜶兩个拍戲了後感情變足好ê，私底下定定做伙出去，koh互相送物件，迷眾定發現宰燦穿栖含ê衫出門，六月接受訪問ê時，宰燦講遐的送攏是栖含送伊ê（嘛有一改是講kah伊借ê），曖昧ê代誌規大堆m̄-nā按呢爾爾，以後有機會才閣講，我已經虛kah目睭看袂清矣，連鞭上課m̄知會按怎無 '——'a

#語意錯誤 #朴栖含 #朴宰燦 #시맨틱에러 #SemanticError #台語文 #栖燦 #張秋情侶 #Taiwanese

#DKZ #KNK #韓國